Mass Si El Hachemi ASSAD, Amaray Amatu n Usqamu Unnig n Timmuzɣa ad yemlil ass n 20 yebrir 2022 di tzeqqa n Furum El Djoumhouria, akked yineɣmasen d yimawlan n yisalen. Timlilit-a ad d-tili ilmend n wahil adelsan ara yesfuglen Tafsut Imaziɣen i d-iheyya s uttikki n tidukkla tadelsant Numidya n Wehran.

 

Asarag-a n tɣamsa ad yili daɣen d tagnit i deg ara d-yawi awal umaray amatu ɣef uheyyi akked tuddsa tussnant tazzayrit n tunumastikt, n yiwen unmugar ussnan di Wehran ɣef tasnadegt s yizwel " Lezzayer: timetti, aɣlan d yismawen". D timlilit tussnant ara d-yettwasuddsen ilmend n umuli wis 60 n timunent d yilmeẓyen, d tin ara d-yemezgen daɣen akked uraren agrakalen ara yeḍrun di Wehran gar 21 yunyu d 05 yulyu 2022.

 

Ahil-a adelsan n usfugel n tefsut imaziɣen ad yili daɣen d tagnit i tikci n yigerdasen n tejmilt i sin wudmawen yernan azal i yidles d tutlayt n tmaziɣt, Said Zamouche, netta d aselway n tiddukla tadelsant Numidya n Wehran, akked Samir Ait Belkacem, amazzag n usisleg ɣer tmaziɣt, d win d-yerran asaru L'opium et le bâton n Ahmed Rachedi ɣer tmaziɣt, s uzewel Asebsi d Uɛekkaz ara d-yettwasneeten di Wehran ilmend n wahil-a.