Timlilit n uciwer d umtawa ger umaray amatu n usqamu unnig n timuzɣa, d uneɣlaf n tmerrit d tinḍi d umahil awaclan.

Ass n warim 22 Duǧember 2020,aneɣlaf n tmerrit d tinḍi d umahil awaclan,  Mass Muḥamed Ḥamidu deg asun nsen aɣelfan yemlal d mass Si Lhacmi Ɛassad, amaray amatu n usqamu unnig n timuzɣa.

Ilmend n temlilit-agi n uciwer d umtawa d-yellan gar-asen yella-d wawal ɣef utteki n uḥric n tmerrit d tinḍi, deg tfugla taɣelnawt tunṣibt yerzan tameɣra n umenzu n yennayer 2971.

Akken meslayen daɣen ɣef uɛiwed n usmaynu n umtawa ger snat n tsudwin yettwazemlen ass n 17 yennayer 2016, d uheggi n usuddes temlilit ara d-yawin ɣef tririt n wazal i wadeg amerray, iɣzer n ɣufi di twilayt n Tbatent, i useggas d-iteddun.

i usmekti, timlilit-a yettwaɛeggen ad d-tili deg aggur n yebrir yzrir, maca tettwadegger sebba n waṭṭan n Kuruna Covid_19.