Almend n wussisen deg lebɣi u usmel n tutlayt tamaziɣt deg uḥric n teywalt di Lezzayer, tella-d tameddit n wass-a Acer 13 di yebrir 2025 yiwet n temlilit n umahil gar uneɣlaf n teywalt Mass Mohammed Meziane akked Umaray amatu n Usqamu Unnig n Timmuzɣa Mass Si El Hachemi Assad, ideg ḥedren ikataren n snat n tsuduyin.

Timlilit-a tusa-d deg usurif n umsesten d umdhel yeḍfer Usqamu Unnig n Timmuzɣa seg useggas n 1995 ideg yettwasbedd, deg lebɣi n usejhed n usemres n tmaziɣt imi d tutlayt taɣelnawt tunṣibt, deg wallalen n teywalt di tmurt-nneɣ.

 

Sin yidisan ulsen-d i lebɣi-nsen ad sdusin ussisen d usejhed n umdhel gar-asen, ladɣa yirmad deg unnar am usuddes n tannanin u usileɣ, n wussan n tezrawt, n yinmugar imezdiyen almend n yimsaduren n teywalt, rnu ɣer waya, asallel n usenfaṛ n uɣmis aktruni s tmaziɣt.

 

deg usurif-a, sin yidisan sunesfen s usuddes n yiwet n temlilit n tezrawt ass n 04 Mayyu 2025 deg ugezdu n tbatent ilmend n wass agraɣlan n tlelli n tɣamsa. D timlilit ara d-yilin s usentel « Talɣut s tmaziɣt di Lezzayer: asekrazal n tirmit d yigliyen» d asurif nniḍen ilmend n usuder n tɣamsa s tmaziɣt.