Ilmend n usmekti n useggas wis 6 n tmettant n umyaru, anaẓur Rachid Aliche, mass Assad Si El Hachemi, amaray amatu n Usqamu unnig n timmuzɣa, yetteka ass n 20 meɣres 2014 deg wahil n usfugel i d-thegga tejmaɛt n taddert n Tgemmunt Ɛezzuz s tallelt n Usqamu aɣerfan n tɣiwant n At Maḥmud, ɣef uqerru-s mass Slimane Alem akked tiddukkla tadelsant Tizizwit. Di tazwara yella-d usarsi n tmuqint n yijeǧǧigen ɣef uẓekka n Rachid Aliche, syin yella-d usenɛet n yiwen usaru yessuli Hamza Ould Mohand ɣef tmeddurt-is. Akken daɣen i d-llan kra n yisaragen d tanagiwin ɣef tudert n umyaru, anaẓur Racid At Mussa (Rachid Aliche) sɣur Abdenour Abdeslam, Arezki Graine, Mustapha Benkhemou, Badi Dida, Si El Hachemi Assad Akked Rachid Oulebsir.