Azul, anṣuf yis-wen(kent),

I kennemti i kenwi merra,

Tanemmirt tameqqrant imi d-terram i tinnubga n Usqamu Unnig n Timmuzɣa.

Tanemmirt i Massa Taneɣlaft imi d-terza ɣur-neɣ, tumen s tikli-nneɣ, tumen s tebrat n Usqamu Unnig n Timmuzɣa.

Ass-a d ass amerbuḥ, d ass n usirem ameqqran, acḥal i t-nerǧa ad d-yaweḍ ! D ass ideg d-mlalen yiɛeggalen n twacult n uɣerbaz i iqeddcen i usnerni n tutlayt akked yidles n tmaziɣt. Mlalen-d ass-a deg tzeqqa-agi :

1-Tanemhalt n tterbegga (Timḍebbert tamezwarut n lḥukuma deg wayen yerzan aɣerbaz).

2-Inemhalen n ttergebba n lwilayat (Azal n 13).

3-Imaswaḍen (Azal n 24).

4-Inelmaden n 3 yiswiren n uselmed (Azal n 100).

Ur nettettu ara tullas d warrac i d-yusan seg at Wasif, aɣerbaz n Bouabderrahmane akked widen i d-yusan seg Lexrub (Qṣenṭina). Ɣef waya, ad nesnemmer aṭas Iselwayen n tɣiwanin n at Wasif d Lexrub.

Agraw am wa yesɛa lmeɛna tameqqrant : D kennemti d kenwi i d inagan n tikli-agi tamaynut i ireṣṣan tadukli “Afus deg ufus” gar Usqamu Unnig n Timmuzɣa d Tneɣlift n Tterbegga Taɣelnawt i yesdukel yiwen Yiswi : d asurrif ɣer sdat.

-Ad nebnu llsas iṣeḥḥan war akukru war aɣiwel.

-Ad nqabel uguren, ad d-naf tifrat i kra yellan d aɛewwiq i usnerni n tmaziɣt deg uɣerbaz azzayri.

Ass-a, awal-nneɣ, tikli-nneɣ akked tekti-nneɣ ad ten-njerrden deg lkaɣeḍ, ad nreṣṣi di rreḥba-agi “AMATWA” i tikkelt tamezwarut gar Usqamu Unnig n Timmuzɣa d Tneɣlift n Tterbegga Taɣelnawt ara d-yeslalen Tasqamut yeccerken snat n tsuda-agi. D wagi i d abrid yessuffuɣen, d tagi i d tarekkabt ara yessiwḍen tamaziɣt ɣer ugar n 11 n lwilayat yellan yakan taswiɛt-agi.

Asirem-nneɣ d ameqqran ad nessiweḍ, deg 2 neɣ 3 n yiseggasen, tamaziɣt ɣer 24 n lwilayat, simi ara d-yaweḍ lawan ideg ara tili deg temnaḍin n tmurt n Lezzayer merra.

 Si El Hachemi ASSAD