Asmel Internet n Usqamu Unnig n Timmuzɣa s wudem amaynut. Tasertit tamaynut n taywalt i d-yewwi usqamu treṣṣa ɣef uzday n wassaɣen akked umaḍal asdawan, tiddukliwin, leqdic deg wennar akked tririt n wazal i wudem aɣelnaw i tmaziɣt.
Tamuɣli-agi d tin ara naf deg wahil n leqdic i d-nhegga i useggas 2014, d tin yefkan azal amuqran I leqdic deg wennar, iberdan n taywalt akked tmetti, d usenqed n yakk igemmaḍ icudden ɣer waḥric n tmaziɣt. lebɣi-nneɣ daɣen a nefk afud i wayen xeddmen imnadiyen d yisdawanen s tullya n twwura i leqdic akked yigezduyen nniḍen, wid teɛna temsalt n tmaziɣt d usnerni-ines. Asurif amezwaru deg ubrid-agi d win i ɣ-yewwin ɣer yidurar n waṭals ablidi (Blida). Seg yidurar-nni, yellan ttmeslayen tamaziɣt iḍelli kan, nger-d tiɣri i wakken, tutlayt tayemmatt n yimelyan n yizzayriyen, ad d-tuɣal s imawlan-is u ad nseḥbiber fell-as. Nebɣa-tt daɣen d tagnitt i wakken ad d-nini tamaziɣt tsaɣ iẓuran di yal tamnaḍt n Lezzayer, d taɣelnawt, d lawan i wakken ad d-teffeɣ seg uɣunzu d temḍerfit.
Aɣbel amezwaru n usqamu unnig n tmmuzɣa, d tiririt n wudem aɣelnaw i tmaziɣt. D iswi i wumi nebges, nqeddec war astehzi. Yewwi-d fell-aɣ a nseḥbiber ɣef yakk tantaliwin n tmaziɣt anda ma ttumeslayent, s usiweḍ n uselmed n tutlayt ɣer tamiwin meṛṛa n tmurt, ula d tid i deg ur ttmeslayen ara tamaziɣt.
Imedyaten d wid yuggten, gar-asen timsirin xedmen yiselmaden d yimaswaḍen n tmaziɣt deg wacḥal n temnaḍin am Tilemsan, Tibest, Waregla, Lbayyeḍ, Nnɛama, Taɣardayt… akken daɣen i d-neḥrez tidwilin s tmaziɣt d Radyuwat n temnaḍin.
Asurif nniḍen amaynut di leqdic-nneɣ, d azday n umtawa akked tuddsiwin tisdawanin akked tidelsanin di Lezzayer neɣ di berra, i wakken ad nefk afud i yimnadiyen d wid akk iqeddcen deg uḥric n tutlayt d yidles amaziɣ.
Leqdic deg wennar iɛeggen usqamu unnig n timmuzɣa ad t-yexdem s uttekki n uɣlif n usegmi aɣelnaw akked yeɣlifen nniḍen yeddan di tmuɣli-agi. Nebɣa ad nbedd ɣef tidett d umkan n tmaziɣt deg uswir n usegmi akked yeḥricen nniden am yidles d yilmeẓyen. D abrid daɣen i wakken ad nesɛu tamuɣli lqayen ɣef ttawilat d wallalen ilaqen ad ten-nesseqdec i usnerni d usmil n tutlayt d yidles amaziɣ di yal tamnaḍt, di yal aḥric.
Asqamu Unnig n Timmuzɣa yegmen aseggas-a ad iberreḥ s sin wahilen n tallelt i unadi d usiẓreg s tmaziɣt. Ad yili s wudem n tiɣri ara d-iger usqamu i wid iqeddcen deg unadi, tira, i wid yesɛan isenfaren yeɛnan tamaziɣt s tantaliwin-is yemgaraden yettwasqedcen di tmurt n Lezzayer.
Ihi, asmel Internet n Usqamu, s wudem-is amaynut, nebɣa-t d udem n tsertit tamynut n taywalt i d-yewwi Usqamu Unnig n Timmuzɣa. Asmel-a ad yennerni s temkarḍit n yedlisen d-yessuffeɣ Usqamu ara yilin di lmendad n yisdawanen, imnadiyen, inelmaden, tiddukkliwin.
