Ilmend n usfuggel n wass agraɣlan n tutlayt tayemmat, deg tikti n usesnes n yimirwen n uwanek deg useḥbiber ɣef tmaziɣt d usijhed n wadeg-ines deg tsudwin yemgaraden n tegduda, asqamu unnig n timmuzɣa yessuddus-d, s tallelt n teɣlift n teɣdemt, ass n tezrawt ilmend n wahil-ines n useggas n 2026 ddaw n uzwel « Tutlayt tamaziɣt deg unagraw aɣelnaw n teɣdemt : Ilmend n usekrazal n tmaziɣt deg usemres aneɣdim d umsadur » ara d-yeḍrun ass n 21 deg furar 2026 deg Uɣerbaz unnig n tinneflest i d-yezgan deg Qliɛa.

Timlilit-a tussnant tettuneḥsab d tamezwarut deg uswir yecban wa, deg wayen i d-tessekfal lebɣi ansuddan yesɛan nniya taḥeqqanit n usemres n tutlayt n tmaziɣt deg unagraw aneɣdim aɣelnaw, akken i d-yella deg yisnarayen n tmendawt

Timlilit-a n tezrawt ad teg tafat ɣef waṭas n yiguma, ladɣa deg ukatar anmendaw d unṣaḍuf deg teɣdemt tasnilsant, tamlilt n tsuqilt taneɣdimt am umikanizm ara iḍemnen tiwtilin n ukala imegdi akked usissen n termitin n wannar akked yicqirriwen usnisen deg usemres n tsuqilt ladɣa deg tselliwin n teɣdemt.

Imahilen n temlilit-a ad d-sdaklen tagruma n yisdawanen akked yiselmaden uzzigen, akken ara yilin ula d kra n yimsaduren n uḥric n teɣdemt -ineflusen, imazzagen, imsuɣal akked yikataren – i d-yusan seg yal tama n temnaḍin n tmurt, akken ad yebbuɣer uskasi d umbadal n termitin ɣef wallalen n usijhed n teɣdemt tasnilsant deg tesga n unagraw aneɣdim.

Deg useɣzef n yirmuden n uneḍruy-a ussnan, ilmend n tikci n wazal n tsekta tussnant d tdelsant n tutlayt n tmaziɣt, ad temmag tmeddit tunẓirt ass-nni dɣa, deg rreḥba n wayyur n rremḍan deg usensu n Yineflusen i d-yezgan deg Lebyar deg Lezzayer. Tameddit-a ad tuɣal tejmilt i xemsa n wudmawen n lḥerma i d-yefkan afud i usekrazal n tutlayt n tmaziɣt deg taɣulin yemgaraden ama deg tussna neɣ deg yidles.

Akken daɣen ara d-yettwassisen, ilmend n tmeddit-a, usissen n usegzawal uzzig n taɣult n uzadaɣ, tsemda akked yimahilen izuyaz s tutlayt n tmaziɣt, i d-yessazreg usqamu unnig n timmuzɣa i umeskar-ines Rachid BADEN. Tasentayt-a taɣarant teskanay-d ussisen imsudar d itikniyen, i d-ttḥettimen yisemras atraren ladɣa deg ukala n usmatu n tutlayt n tmaziɣt deg tallunin timsudar.