Arraz n Uselway n Tegduda i Tsekla d Tutlayt n Tmaziɣt

D ussis ameqran i usmil n tmaziɣt di Lezzayer

Taẓrigt tis Kraḍ ɣef tewwura.

 

Taẓrigt tis kraḍ n warraz n uselway n Tegduda n Tsekla d Tutlayt n tmaziɣt, yersen ddaw leɛnaya n Uselway n tegduda Mass Abdelmadjid Tebboune, ad d-tili ass n 12 Yennayer 2023 di Tɣardayt, ilmend n tfugliwin n umenzu n yennayer 2973, ara d-yilin s tenmehla n usqamu Unnig n Timmuzɣa.

I usmekti, Arraz-a i d-ilulen almend n tanaḍt taselwit uṭṭun 20-228 n wass n 19 Ɣuct 2020, s usumer n Usqamu unnig n Timmuzɣa yedda deg tsuraf n useḍru n yimagraden n tmendawt, ladɣa taseddart tis kuẓ n tezwart-is iran ad tessisen allalen d yiberdan n usmil d usenfali n tutlayt tamaziɣt deg taɣulin yemxallafen, d usmucceɛ n wayen yettwaxedmen d asnulfu d unadi s tantaliwin meṛṛa n tmaziɣt yellan di lezzayer. Ihi iswi n warraz-a d asebɣes n usnulfu d unadi ussnan  ilmend n usebɣer n tutlayt d yidles n tmaziɣt.

Deg teẓrigt-a tis kraḍ , seld amdal n ujerred ɣef tɣerɣert tumḍint www.arraz.hcamazighite.dz, yewweḍ wuṭṭun ɣer 132 n yimahilen yettikkin ḍeg temsizzelt deg tesmilin-is yemxallafen.Asqamu Unnig n Timmuzɣa yumer s wuṭṭun-a n yemttikkiyen, d-yessenɛaten azal takken yisdawanen d yimeskaren yal aseggas i temsizzelt-a, d agmmuḍ d-yeskanen tuddsa timgerrezt n warraz-a yessezwaren aqadeṛ n yilugan d tewtilin tussnanin.

Deg yimalas-a ihi, asmil n yimgallan ad d-lhun s usekyed d usekrazal n wahilen-a d-yersen ɣer temsizzelt, yal taɣult ad tesɛu azal deg usenqed , d tasekla, tasnilest, anadi deg tgemmi tarangawt akked yisenfaren itiknulujiyen d wumḍin.

Imahilen-a yettikkin deg temsizzelt ad ilin gar ifassen n yiɛeggalen n usmil n yimgallan, wigi tuget deg-sen d iselmaden isdawanen imuzzag deg tezrawin timaziɣin, d wid ysɛan aswir unnig d-yeffeɣn seg tesdawin n lezzayer, ɣer yidis-nsen ad illin imganesasen n kra yeɣlifen.

Arraz n uselway n Tegduda n Tsekla d Tutlayt n Tmaziɣt yessers llsas i ufran n yisnulfuyen deg tsekla akked unadi s tarrayin tussnanin, ara yernun azal i yidles d tutlayt n tmaziɣt yellan d agerruj n yizzayriyen akken ma llan.